Kalaallisut oqaasilerinermi institutimi sammineqartarput kalaallisut oqaatsit, atuakkialerineq aamma tusagassiuutit, Kalaallit Nunaanniinnaanngitsoq, aammali nunarsuaq tamakkerlugu.

Atuakkialerinermi ilinniartitsinerup siunertaraa itsarnitsanik oqaluasaarutit, atuakkiat pisoqaanerit, nunasiaalernerlu sioqqullugu maannamut qanoq ineriartorsimanerat, atuakkialerinermi, filmini, nipilersornermi tusagassioriaatsillu allat aqqutigalugit.

Oqaasilerinermi ilisimatusarnermi oqaasilerinermi aammalu oqaatsinik isumasiuinermi oqaatsinik misissueqqissaarneq  kalaallisuinnaanngitsoq, allamiulli oqaasiinik  assersuuteqartarluni ingerlanneqarpoq, paasiniarlugu, kalaallisut oqaatsit suut immikkuullarissutigaat nunarsuarmiullu oqaasiisa suut assigiissutigaat. Oqaatsinik ilisimatusarneq sumiorpaluutsinittaaq ilisimatusarnermik ilaqarpoq, marluinnik oqaaseqartuunermik, oqaluttup tusarnaartullu akunnerminni qanoq iliuusaat aammalu oqaatsit inuiaqatigiillu ataqatigiissusaat.

Ilinniartitaaneq ilusilerneqarsimavoq ukiut siulliit marluk oqaasilerinermik, atuakkialerinermik, tusagassiornermillu tunngaviusunik ilisimasaqalernissamik, kalaallisuinnaanngitsoq aammali naliginnaasumik. Taakkua saniatigut Ilisimatusarfimmi ilinniartunut tamanut filosofi-mi aamma videnskabsteori-mi ilinniartitsisoqartarpoq.

Ukiut siulliit marluk ilinniagassat aalaakkaasuupput, tamatumali kingorna ilinniartut oqartussaaqataanerat annerulersarpoq, sammisassatillu aalajangeeqataaffigisinnaalertarlugit. Institutip ilinniartitsisutigut, aammalu avataaniit ilinniartitsisoqartarnikkut aaqqiisoqartarnerani neqeroorutigineqarsinnaasut apeqqutaallutik kiisalu ilinniartut akunnermi qanoq isumaqatigiissinnaanerat apeqqutaalluni.

Ilinniarneq ilinniarfinni ingerlaqqiffiusuni ilinniartitsisunngorsinnaanermik ilaatigut siunertaqarpoq. Ilinniagaq oqaasilerinerinnarmik, atuakkialerinerinnarmik tusagassiuutilerinerinnarmik annertuumik ilinniarfiuunnarani aammali ilinniarnerup ingerlanerani paasinnissinnaanermik, misissueqqissaarsinnaanermik isornartorsiuerpalaartumillu eqqarsarsinnaanermik piginnaasaqarfiulersarpoq, taakkualu saniatigut namminersorluni ajornartorsiutaasinnaasunik aaqqiisinnaalersitsisarluni-piginnaasat tamarmik pisortat suliffiutaanni, namminersorlunilu ingerlatsivinni inuutissarsiorfinnilu allani atorluarneqarsinnaasut.