Isumaginninnermi siunnersortinngorniarneq inuiaqatigiilerinermut tunngaveqarluni ilinniarneruvoq. Atuagarsornermi immikkoortuni fagit atuartitsissutigineqartartut sisamanik sammiveqarput: Inunnik isumaginninnermik suliaqarneq, inuiaqatigiilerineq, tarnip pissusaanik ilinniarneq kiisalu inatsisilerineq.Ilinniarnerup siunertaraa isumaginiinermik siunnersortinik ilinniartitsinissaq inuiaqatigiinni inuuniarnermi ajornartorsiutinik pinaveersaartitsisinnaasunik aamma iluaqusiisinnaasunik. Ilinniarneq tassaavoq illit imminut ilikkarnermik annertuumik angusaqarfigisinnaasat aqqutigalugulu inuppassuarnik attaveqalersinnaallutit. Ilinniarneq naammassigukku ilisimasatit atorlugit inuit ikiorneqarnissaminnik pisariaqartitsisut ikiorsinnaassavatit. Tamanna inuttut  immersorluarneqarnermik kinguneqarsinnaavoq sulinermilu nuannarisaqarninnut aallaaviusinnaaluni.
 
Ilinniartitaanerup aaqqissuussaanera
Inunnik isumaginninnermik suliaqartutut bachelorinngorniarneq ukiunik 3½-inik sivisussuseqarpoq. Ilinniartitaaneq modulinut agguataarneqartarpoq, ilinniariaaserlu ingerlanneqartarpoq holdikkaarluni, eqimattakkuutaarluni, nammineq atuarluni, suliniutit aamma sulilluni sungiusarneq paarlakaallugit. Sulilluni sungiusarneq semesterit sisamaanni ingerlanneqassaaq sap. Ak. 16-inik sivisussueqarluni. Nunatsinni imaluunnit nunani avannarlerni sungiusarneq qinnutigineqarsinnaalluni.
Ilinniarnerit qaffassarsinnaavat diplom-imut ingerlaqqillutit imaluunniit Aalborg Universitetimi kandidatinngorniarlutit.
 
Piumasaqaatit
Ilinniarnertuunngorniarfimmi imaluunniit assingusumik naammassinnissimaneq Nunatsinni imal. Nunani avannarlerni. Imaluunniit inersimasunut GU ukioq ataaseq minnerpaamillu qaammatini arfinilinni attuumassuteqartumik sulisimaneq. Immikkut akuerineqarnissamut qinnuteqartoqarsinnaavoq, attuumassuteqartumik ilinniarnermik naammassisaqarsimaguit inunnillu isumaginninnermik sulinermik misislittagaqaruit. Ilinniarneq annerusumik danskisut ingerlanneqartarpoq, aammali kalaallisut ilinniartitsisoq pisinnaagaagat. Ilinniagassat kalaallisut, danskisut aamma tuluttut allaqqasarput. Oqaluttariarsorluni misilitsinnerni kalaallisut nutserisumik periarfissaqartitsisoqartarpoq. Ukiakkut semesterip aallartinnerani ilinniartut nutaat aallartittarput. Qinnuteqarfissaq kingulleq marsip aallaqqaataani.

Atorfininnissamut periarfissat
Nunatsinni isumaginninnermik siunnersortit amigaataaqaat. Taamaattumik periarfissaqarluassaatit pisortani, soorlu namminersornerusuni kommuuninilu, kriminalforsorgimi napparsimaveqarfinnilu qinnuteqarnissannut, aammali namminersortut sulliviini imaluunniit soqutigisaqaqatigiiffinni. Nunani avannarlerni isumaginninnermik siunnersortitut qinnuteqarnissat aamma perisarfissaavoq.

Attaveqarfissaq
Isumaginninnermi immikkoortortaqarfik – Ilimmarfimmi Ilisimatusarfik
Ilisimatusarfik
Manutooq 1
Postboks 1061
3900 Nuuk
Oqarasuaat: (+299) 36 23 00
Fax: (+299) 36 23 01
Email: mail@uni.gl
Nittartagaq: www.uni.gl