Inuiaqatigiilerinermik ilinniarnermi inuiaqatigiinni kalaallini aammalu nunani allani pissutsinut ilisimasaqarlualissaatit. Ilinniartitaaneq atituumik tunngaveqarpoq ingerlanneqarpullu inuiaqatigiinni ilisimatusarnermik ingerlatsinermik ilinniakkat pingaaruteqartut makkuusut:politikkikkut ingerlatsinermik ilinniarneq (politologi), inuiaqatigiinni innuttaasut pissusiinik ilinniarneq (sociologi), aningaasaqarnermut tunngasunik ilinniarneq (økonomi) aamma inatsisinut tunngasunik ilinniarneq (jura). Ilinniakkat tamakku aqqutigalugit assersuutigalugu pisortat ingerlatsiviisa suliassai suuneqarinik ataatsimut ilisimasaqarfigilersinnaavatit. Siunissami pisortat ingerlatsiviisa qanoq ingerlanneqarnissaannut ilusilersornissaannullu peqataanissannut ilisimasaqalissaatit sakkussaqalissallutillu. Ilinniartitaaneq tamarmi Kalaallit Nunaanni pissutsinik aallaveqarpoq, nunarsuarli tamakkerlugu sammivigineqarluni. Periarfissaqarputit ilinniagaqarnerup ilaa nunani allani ingerlassinnallugu.
Ilinniartitaanerup aaqqissuussaanera
Inuiaqatigiilerinermut bachelorinngorneq ukiunik pingasunik sivisussuseqarpoq - kandidatinngorniaraanni taakku qaavatigut ukiut marluk. Ilinniakkami qitiutinneqartuni sisamaasuni politikkikkut ingerlatsinermi ilinniarnermi (politologi), ilaatigut sammineqartarput inuiaqatigiit aaqqissuussanerat, politikikkut aaqqissuussineq kiisalu tamat oqartussaanerat. Inuiaqatigiinni innuttaasut pissusiinik ilinniarnermi (sociologi) sammineqartarput inuit aamma inuiaat ataasimoortut akornanni susassareqatigiinneq, aaqqiagiinnginnerit kiisalu suleqatigiinneq. Aningaasaqarnermut tunngasunik ilinniarnermi (økonomi) sammineqartarpoq Kalaallit Nunaata aningaasaqarnera kiisalu aningaasaqarnermut politikki. Inatsisinut tunngasunik ilinniarnermilu (jura) ilinniagarissavatit inatsisit aamma taakku atorneqartarnerat.
Ilinniakkani taakkunani piumasaqaataapput piginnaaneqarneq kiisalu tunngaviusumik ilisimasat. Taamaattumik suleriaatsinut tunngasut soorlu inuiaqatigiinnik nassuiaasersuineq misissueriaatsit kiisalu naatsorsueqqissaarneq ilinniartitaanermi ilaatinneqarput.
Piumasaqaatit
Piumasaqaatit tulliutut naammassineqarsimassapput:
- Ilinniarnertuunngorniarfimmi imaluunniit assingusumik naammassinnissimaneq agguaqatigiissitsilluni 8 (tulleriinnilersueriaaseq 13 atorlugu).
- Matematik atuarnermi ilaasimassaaq minnerpaamik qaffasissuseq B/immikkut toqqarlugu.
Piumasaqaatit taakku saneqqullugit immikkut akuerineqarnissamut qinnuteqarsinnaavoq.
Atorfininnissamut periarfissat
Misilittakkat takutippaat amerlanerit pisortat ingerlatsiviinni atorfinittartut, kisianni aammattaaq kattuffinni kiisalu suliffeqarfinni annerusuni periarfissaqarpoq.
Attaveqarfissaq
Inuiaqatigiilerinermut immikkoortortaqarfik
Ilimmarfimmi Ilisimatusarfik
Ilisimatusarfik
Manutooq 1
Postboks 1061, 3900 Nuuk
Tel.: (+299) 36 23 00 - Fax: (+299) 36 23 01
Email: mail(at)uni.gl
Nittartagaq: www.uni.gl